Liturgjia e orëve – 20 gusht – Shën Bernardi – e martë – Java XX gjatë vitit
Written by RadioMariaAlb on July 20, 2024
20 gusht, Shën Bernardi, abat dhe mësues i Kishës
Përkujtim
Lindi në vitin 1090 pranë Digjonit në Francë. I edukuar me devocion, në vitin 1111 iu bashkua murgjërve Cistercensë dhe pak më vonë, i zgjedhur abat i manastirit të Kiaravales, udhëhoqi në mënyrë të shkëlqyer murgjërit në praktikimin e virtyteve si me veprën ashtu edhe me shembullin. Për shkak të skizmave të lindura në Kishë, përshkoi Evropën për të rivendosur paqen dhe bashkimin. Shkroi shumë vepra që i përkasin teologjisë dhe asketikes. Vdiq në vitin 1153.
Nga Përbashkorja e mësuesve të Kishës (fq. 1588) ose e shenjtërve: rregulltarë (fq. 1707) me psalmet e ditës në psalter.
20 gusht, Shën Bernardi, abat dhe mësues i Kishës
Ftesa
D O Zot, hapi buzët e mia.
C Dhe goja ime do të kumtojë lavdet e tua.
Ant. Ejani ta adhurojmë Krishtin Zot,
që është burimi i çdo urtie.
Psalmi 95 /94/
Grishje për të lavdëruar Hyjin
Nxitni njëri-tjetrin dita-ditës deri sa të zgjasë kjo “Sot” (Heb 3, 13).
Ejani t’i këndojmë Zotit, *
t’i brohorasim Hyjit, Shëlbuesit tonë.
T’i dalim para me falënderje, *
t’i këndojmë këngë hareje!
Ant. Ejani ta adhurojmë Krishtin Zot,
që është burimi i çdo urtie.
Sepse Hyj i madhërishëm është Zoti, *
Mbret i madhërueshëm mbi të gjithë zotat!
Sepse në dorën e tij janë thellësitë e tokës, *
të tijat janë edhe majat e maleve,
i tiji është deti ‑ ai e krijoi, *
duart e tija e formuan tokën.
Ant. Ejani ta adhurojmë Krishtin Zot,
që është burimi i çdo urtie.
Ejani ta adhurojmë, të biem përmbys para tij, *
të biem në gjunjë para Zotit që na krijoi!
Sepse ai është Hyji ynë,
ne jemi populli i kullosës së tij, *
grigja që ai ruan.
Ant. Ejani ta adhurojmë Krishtin Zot,
që është burimi i çdo urtie.
Oh sikur ta ndienit sot zërin e tij: *
“Mos e bëni zemrën tuaj gur porsi në Meribë,
porsi në ditë të Masës në shkretëtirë, †
kur etërit tuaj më vunë në sprovë: *
më provuan megjithëse i kishin parë veprat e mia.
Ant. Ejani ta adhurojmë Krishtin Zot,
që është burimi i çdo urtie.
Dyzet vjet më mërziti ajo brezni †
e thashë: ‘Popull zemërluhatshëm është ky, *
që s’i njeh udhët e mia.’
Prandaj u përbetova në hidhërimin tim: *
‘Askurrë s’do të hyjnë në prehjen time!’”
Ant. Ejani ta adhurojmë Krishtin Zot,
që është burimi i çdo urtie.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Ejani ta adhurojmë Krishtin Zot,
që është burimi i çdo urtie.
20 gusht, Shën Bernardi, abat dhe mësues i Kishës
Shërbesa e leximeve
V Hyj, më eja në ndihmë!
P O Zot, shpejto të më ndihmosh!
V Lavdi Atit e Birit e Shpirtit Shenjt,
P si ka qenë në fillim,
ashtu tash e përgjithmonë e jetës. Amen. (K. P. aleluja).
Kjo hyrje nuk përdoret kur Shërbesa e lutjes fillon me Ftesë.
Himni
Mësues i amshuar, nderohesh e i virtytshëm,
Krisht, ti që hape ligjet e shëlbimit,
që me të drejtë të çmojnë se fjalë të jetës
vetëm ti ke.
Dhe, o bari i mirë i botës, ty të thërrasim,
zbritur prej qiellit gjithmonë ke mbështetur
fjalët e Nuses, se ajo do t’ishte prore
ndriçim për botën.
Madje krijove shërbyes të shkëlqyer,
duke ndriçuar porsi yje t’arta,
që ne të na hapin mësimet e vërteta
të jetës së lume.
Ndaj, për ty lavdet të jehojnë, o Mjeshtër,
që resh të mira të mahnitshme të Shpirtit
me gojë të t’urtëve, ku fuqishëm duket
drita jote e shenjtë.
Tash ai që i drejtë kremtohet turmës sate
t’i japë ndihmë për t’u futur në lumninë e dritës,
derisa një ditë për ty të këndojë himnet
në dritë të plotë. Amen.
Ant. 1 Nëse ndokush dëshiron të jetë i pari,
le të jetë i fundit, dhe shërbëtor i të gjithëve.
Psalmi 21 /20/ (2-8. 14)
O Zot, mbreti gëzohet në saje të fuqisë sate, *
plot hare e mbush shpëtimi yt.
Ti ia plotësove dëshirën e zemrës së tij, *
nuk i përbuze lutjet e buzëve të tija.
Që më parë i dhe bekime të mëdha: *
mbi krye i vure kurorë ari të kulluar.
T’u lut për jetë e ti i dhe *
ditë të shumta – në jetë të jetës.
E madhe është lavdia e tij në shpëtimin tënd: *
e stolise me madhëri e me shkëlqim.
Ti e bëre bekim përgjithmonë, *
e kënaqe me gëzim në praninë tënde.
Sepse mbreti shpresën e ka në Zotin, *
në saje të besnikërisë së të Lartit Zot s’do të trandet.
Ngrihu, o Zot, me fuqinë tënde, *
e ne do të këndojmë
e do të vallëzojmë për ngadhënjimin tënd.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Nëse ndokush dëshiron të jetë i pari,
le të jetë i fundit, dhe shërbëtor i të gjithëve.
Ant. 2 Kur të lajmërohet Kryebariu,
do të kurorëzoheni me lavdi të pavdekshme.
Psalmi 92 /91/ I (2-9)
Është punë e mirë ta lavdërosh Zotin, *
t’i këndohet Emrit tënd, o Zot i tejetlartë.
Të shpallim dashurinë në mëngjes *
e gjatë natës besnikërinë tënde,
me harpë dhjetëkordash e me lirë, *
me këngë përcjellë me cetër.
Se ti, o Zot, më gëzove me veprat e tua, *
kënaqem për veprat e duarve të tua.
Sa të madhërishme janë veprat e tua, o Zot, *
sa të thella mendimet e tua!
Njeriu i pamend nuk i di, *
dhe i marri nuk do t’i kuptojë.
Po edhe në mbifshin mëkatarët porsi bari, *
e në lulëzofshin ata që bëjnë keq,
janë të caktuar për bjerrje të pasosur, *
vetëm ti je i Tejetlartë për amshim, o Zot!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Kur të lajmërohet Kryebariu,
do të kurorëzoheni me lavdi të pavdekshme.
Ant. 3 Shërbëtor i mirë dhe besnik,
hyr në gëzimin e Zotërisë tënd.
II (10-16)
Sepse qe, o Zot, armiqtë e tu, †
sepse qe, o Zot, armiqtë e tu do të birren, *
do të shpërndahen të gjithë keqbërësit.
Ti ma rrite fuqinë porsi të buallit, *
më shugurove me më të pastrin vaj.
Prej së larti i shikon syri im ata që më urrejnë, *
veshët e mi pa tronditje i dëgjojnë kundërshtarët e mi.
I drejti lulëzon si palma, *
rritet porsi cedri i Libanit.
Të mbjellë në Shtëpinë e Jakobit *
lulëzojnë në banesat e Hyjit tonë.
Japin fruta edhe në pleqëri, *
janë të kërthndeztë e plot shëndet,
për të shpallur se Zoti është i drejtë: *
Qeta ime, në të cilin nuk ka të meta!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Shërbëtor i mirë dhe besnik,
hyr në gëzimin e Zotërisë tënd.
D Prej gojës sime do ta dëgjosh fjalën,
C dhe atë do t’ua kumtosh vëllezërve të tu.
Leximi i parë
Prej librit të Siracidit 39, 1c-14
I urti shqyrton urtinë e të gjithë të vjetërve dhe i kushtohet hulumtimit të profecive,
i mban mend thëniet e njerëzve të përmendur dhe depërton në hollësitë e shëmbëlltyrave.
Kërkon vështrimin e fshehtë të fjalëve të urta dhe thellohet në fshehtësitë e shëmbëlltyrave.
Shërben mes njerëzve të mëdhenj dhe merr pjesë në mbledhje të princave.
Udhëton në viset e popujve të huaj dhe fiton përvojën e të mirave e të këqijave mes njerëzve.
Ai ia kushton zemrën e vet herët, që në agim, Zotit që e ka krijuar dhe lutet para të Tejetlartit.
E hap gojën e vet në uratë e lutet për faljen e gabimeve të veta.
Nëse do të jetë vullneti i të Madhit Zot do të mbushet me shpirtin e kuptimit.
Si shi i lëshon fjalët e urtisë së vet e me uratë e lavdëron Zotin.
Zoti e drejton këshillin dhe urtinë e tij, kurse ai përsiat fshehtësitë e Zotit.
Ai e sqaron mësimin që i ka qenë dhuruar dhe mburrjen e vet e ka në Ligjin e Besëlidhjes së Zotit.
Shumë do ta lavdërojnë urtinë e tij dhe kurrë nuk do të harrohet.
Kujtimi i tij nuk do të bjerë në harresë dhe emri i tij do të jetojë nga breznia në brezni.
Urtinë e tij do ta shpallin kombet e lavdi i tij do të përmendet në bashkësi.
Përgjigjja Krh. Sir 15, 5. 3. 6
C Zoti ia çeli gojën mes kuvendit, * e mbushi me shpirt urtie e kuptimi.
D Lumturi të madhe dhe një kurorë gëzimi ia dha Zoti,
C e mbushi me shpirt urtie e kuptimi.
Leximi i dytë
Nga “Fjalimet mbi Këngën e këngëve” i shën Bernardit, abat
(Fjal. 83, 4-6; Oper omnia, bot. Cistercen 2, [1958] 300-302)
Dua sepse dua, dua për të dashur
Dashuria i mjafton vetvetes, pëlqehet nga vetvetja e saj. Është meritë dhe shpërblim i vetës së saj. Dashuria nuk kërkon arsye, nuk kërkon përparësi jashtë vetvetes. Përparësia e saj qëndron në faktin se ekziston. Dua sepse dua, dua për të dashur. Është gjë e madhe dashuria nëse niset nga burimi i saj, nëse udhëhiqet tek burimi i saj, nëse kthehet tek burimi i saj. Nga ai burim e merr ushqimin që t’mund të vazhdojë të rrjedhë. Dashuria është e vetmja ndër të gjitha lëvizjet e shpirtit, ndër të gjitha ndjenjat dhe dëshirat, me të cilën krijesa mund t’i përgjigjet Krijuesit, edhe pse jo në të njëjtin nivel; e vetmja me të cilën mund të shpaguajë të afërmin dhe në këtë rast me siguri në të njëjtin nivel. Kur Hyji dashuron, nuk dëshiron gjë tjetër gjë tjetër veçse të duhet. Nuk do gjë tjetër veçse për të qenë dashuruar, duke ditur se ata që do e duan do të kënaqen me këtë dashuri. Dashuria e Dhëndrit, apo më mirë të themi të Dhëndrit-Dashuri kërkon vetëm shkëmbimin e dashurisë dhe besnikërinë. Le t’i jetë, pra, të dashurës e lejueshme që të duajë. Përse e fejuara, dhe e fejuara e Dashurisë nuk u dashka të duan? Përse nuk u dashka të dashurohet Dashuria?
Me të drejtë, duke u rënë mohit të gjitha dashurive të tjera, anësohet e tëra dhe vetëm drejt Dashurisë, ajo që për të këmbyer dashurinë synon të barazohet me të. Por do të bëhet vërejtje, se, edhe nëse e Fejuara do të shndërrohet krejtësisht në Dashuri, nuk do t’mundet kurrë të arrijë nivelin e burimit të amshuar të dashurisë. Është e sigurt se nuk do t’mund të barazohen kurrë i dashuri dhe Dashuria, shpirti dhe Fjala, e fejuara dhe Dhëndri, Krijuesi dhe krijesa. Në fakt, burimi jep gjithmonë shumë më shumë se ajo që i mjafton atij që ka etje.
Por ç’rëndësi kanë të gjitha këto? A thua do të pushojë, apo do të shuhet e gjithë dëshira e së fejuarës e cila e pret çastin e martesës, a thua do të shuhet etja e atij që psherëtin, afshi i atij që dashuron, besimi i atij që parashijon, pse nuk është i aftë të vrapojë me një gjigant, të garojë në ëmbëlsi me mjaltin, në butësi me qengjin, në çiltërsi me zambakun, në shkëlqim me diellin, në dashuri me atë që është Dashuria? Me siguri se jo. Edhe pse në të vërtet krijesa dashuron më pak, sepse është më e ulët, nëse megjithatë dashuron me gjithë vetveten, nuk i mbetet asgjë për të shtuar. Asgjë nuk mungon atje ku ka gjithçka. Për këtë arsye për të, të dashurojë kështu është e njëjtë si të ketë kremtuar martesën, sepse nuk mund të duajë kështu dhe të mos jetë e dashur. Martesa e plotë dhe e përsosur qëndron në pëlqimin e te dyve, përveç në rast se ndonjëri dyshon se shpirti është i dashur nga Fjala, më parë dhe më shumë.
Përgjigjja Krh. Ps 31 /30/, 20; 36 /35/, 9
C Sa e madhe është mirësia jote, o Zot, * të cilën e ruan për ata që të druajnë.
D Ngihen me begatinë e Shtëpisë sate, u shuan etjen nga përroi i kënaqësisë sate.
C Të cilën e ruan për ata që të druajnë.
Lutja
O Hyj, ti deshe që shën Bernardi abat, përplot me dashuri për Kishën tënde, të jetë në shtëpinë tënde llambë që digjet e ndriçon; na jep edhe neve atë zell shpirtëror që të jetojmë porsi bij e bija të vërtetë të dritës. Nëpër Zotin.
Përfundimi i Orës sikurse në Shërbesën e rëndomtë.
20 gusht, Shën Bernardi, abat dhe mësues i Kishës
Ftesa
D O Zot, hapi buzët e mia.
C Dhe goja ime do të kumtojë lavdet e tua.
Ant. Ejani ta adhurojmë Krishtin Zot,
që është burimi i çdo urtie.
Psalmi 95 /94/
Grishje për të lavdëruar Hyjin
Nxitni njëri-tjetrin dita-ditës deri sa të zgjasë kjo “Sot” (Heb 3, 13).
Ejani t’i këndojmë Zotit, *
t’i brohorasim Hyjit, Shëlbuesit tonë.
T’i dalim para me falënderje, *
t’i këndojmë këngë hareje!
Ant. Ejani ta adhurojmë Krishtin Zot,
që është burimi i çdo urtie.
Sepse Hyj i madhërishëm është Zoti, *
Mbret i madhërueshëm mbi të gjithë zotat!
Sepse në dorën e tij janë thellësitë e tokës, *
të tijat janë edhe majat e maleve,
i tiji është deti ‑ ai e krijoi, *
duart e tija e formuan tokën.
Ant. Ejani ta adhurojmë Krishtin Zot,
që është burimi i çdo urtie.
Ejani ta adhurojmë, të biem përmbys para tij, *
të biem në gjunjë para Zotit që na krijoi!
Sepse ai është Hyji ynë,
ne jemi populli i kullosës së tij, *
grigja që ai ruan.
Ant. Ejani ta adhurojmë Krishtin Zot,
që është burimi i çdo urtie.
Oh sikur ta ndienit sot zërin e tij: *
“Mos e bëni zemrën tuaj gur porsi në Meribë,
porsi në ditë të Masës në shkretëtirë, †
kur etërit tuaj më vunë në sprovë: *
më provuan megjithëse i kishin parë veprat e mia.
Ant. Ejani ta adhurojmë Krishtin Zot,
që është burimi i çdo urtie.
Dyzet vjet më mërziti ajo brezni †
e thashë: ‘Popull zemërluhatshëm është ky, *
që s’i njeh udhët e mia.’
Prandaj u përbetova në hidhërimin tim: *
‘Askurrë s’do të hyjnë në prehjen time!’”
Ant. Ejani ta adhurojmë Krishtin Zot,
që është burimi i çdo urtie.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Ejani ta adhurojmë Krishtin Zot,
që është burimi i çdo urtie.
Lavdet e mëngjesit
V Hyj, më eja në ndihmë!
P O Zot, shpejto të më ndihmosh!
V Lavdi Atit e Birit e Shpirtit Shenjt,
P si ka qenë në fillim,
ashtu tash e përgjithmonë e jetës. Amen. (K. P. aleluja).
Himni
Bernard, inxhi prej qiellit,
lavdet, që ne të thurim,
ktheji në gëzimet tona
shpëtimi e në dhurata.
Ty Krishti ndezi n’plagën
e brendshme t’dashurisë,
e me kujdes ty zgjodhi
mburojë, shtyllë, llambë e Kishës.
Shpirti jetëdhënës të fali
gojë t’rrjedhshme të vërtetës,
duke të folë për mjaltët
e fshehtë n’kullota t’Engjëjve.
Me hov dashnie t’pastër
ty Nëna Virgjër mbushi,
që askush s’e ligjëroi
më thellë më lart se ti.
Ty të kërkuan gjykatës
mbretër, mësues, prelatër,
dhe adhurues vetmie
me famë e mbushe botën.
Trinisë i qoftë lavdia,
që duke lënë të shfaqet,
na dhëntë të shijojmë t’mirat
me ty n’gëzim t’përjetshëm. Amen.
Ose një himn tjetër, apo një këngë e miratuar nga autoritetet kishtare.
Ant. 1 Ty, o Zot, do të të këndoj himne
dhe do ta ndjek udhën e përsosmërisë.
Psalmi 101 /100/ (1-8)
Programi i mbretit besnik ndaj Zotit
Nëse më doni, do t’i mbani urdhërimet e mia (Gjn 14, 15).
Dua të këndoj dashurinë e drejtësinë, *
për nderin tënd, o Zot, do t’i bie muzikës!
Do të përparoj në udhën e pafajësisë: *
kur do të vish ti tek unë?
Do të jetoj në pastërtinë e zemrës sime, *
brenda shtëpisë sime.
S’do të vë para syve të mi asnjë padrejtësi, †
e urrej njeriun që vepron keq: *
nuk do të qëndrojë ngjat meje.
Zemra e keqe do të jetë larg meje, *
bakeqin s’dua ta njoh.
Atë që fshehtas i shpifet të afërmit të vet
unë do ta zhbij. *
Mendjemadhin dhe krenarin
nuk do ta duroj.
I kam sytë mbi të drejtët e vendit *
që të banojnë bashkë me mua,
ai që ecën udhës së pafajësisë, *
do të jetë shërbëtori im.
Nuk do të banojë brenda shtëpisë sime
ai që gënjen, *
ai që flet rrena nuk do të qëndrojë para syve të mi.
Çdo mëngjes do të shfaros keqbërësit e vendit, †
do t’i zhbij prej qytetit të Zotit *
të gjithë ata që bëjnë paudhësi.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Ty, o Zot, do të të këndoj himne
dhe do ta ndjek udhën e përsosmërisë.
Ant. 2 Mos e largo mëshirën tënde prej nesh, o Zot.
Kënga Dan 3, 26. 27. 29. 34-41
Kënga e Azarisë në furrë
Pendohuni e kthehuni, që t’ju shlyhen mëkatet (Vap 3, 19).
I bekuar je, o Zot, Hyji i etërve tanë, *
i madhërueshëm, emri yt i lavdishëm në shekuj,
sepse je i drejtë *
në gjithçka na bëre,
të gjitha veprat e tua e udhët e tua janë të drejta, *
të gjitha gjyqet e tua të vërteta.
Vërtet mëkatuam e vepruam paudhërisht †
duke u larguar prej teje, *
porse tepër shumë mëkatuam!
Oh, mos na lësho për përgjithmonë †
‑ pashë emrin tënd ‑ *
e mos e shpërndaj besëlidhjen tënde;
as mos e tërhiq mëshirën tënde prej nesh, *
pashë Abrahamin, të dashurin tënd,
pashë Izakun, shërbëtorin tënd, *
e pashë Izraelin, shenjtin tënd,
të cilëve u zotove se do t’ua shumosh farën †
porsi yjet e qiellit e porsi rërën *
që është në bregun e detit,
sepse, o Zot, *
jemi pakuar më shumë se të gjithë popujt,
të përvujtëruar kudo mbi mbarë tokën *
në ditën e sotme për shkak të mëkateve tona!
Ne në këtë kohë nuk kemi †
princ as profet as prijës, *
fli shkrumbimi, therore, as kushtime as kem,
as vend ku të kushtojmë ty flitë e fryteve të para *
që të mund të gjejmë mëshirë.
Por na prano me shpirt të përgrirë *
e të përvujtëruar në shpirt,
porsi fli shkrumbimi deshësh e mëzetërish *
porsi mijëra qengjash të majmë
e tillë le të jetë flija jonë para teje sot *
e përsosna ne që të vemi pas teje
sepse s’do të turpërohen *
ata që shpresën e kanë vënë në ty.
Tani do të vemi pas teje me gjithë zemër, *
ty do të të nderojmë, fytyrën tënde do të kërkojmë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Mos e largo mëshirën tënde prej nesh, o Zot.
Ant. 3 Do të të këndoj një këngë të re,
ty o Hyj, që jep fitoren.
Psalmi 144 /143/ (1-10)
Lutja e Mbretit për fitore dhe për paqe
Gjithçka mundem me ndihmën e Atij që më jep fuqi (Fil 4, 13).
Qoftë bekuar Zoti, ndihmëtari im †
që m’i mëson duart për luftim *
e gishtërinjtë për luftë.
Mëshira ime dhe kështjella ime, *
strehimi im dhe çlirimtari im,
shqyti im pas të cilit fshihem, *
ai që popullin tim e vë nën sundimin tim.
O Zot, e ç’është njeriu që t’i japësh rëndësi, *
biri i njeriut që të kujdesesh për të?
Njeriu i përngjan avullit, *
ditët e tij si hija që kalon.
O Zot, priri qiejt e tu e zbrit, *
preki malet e ato le të tymojnë.
Gjuaj rrufe e shpërndaji armiqtë, *
flakëro shigjetat dhe shpartalloji!
Shtrije dorën tënde prej së larti †
më shpëto e më nxirr prej ujërave të mëdha, *
prej kthetrave të bijve të huaj,
goja e të cilëve gënjeshtra veç flet, *
e djathta e të cilëve ngrihet për t’u betuar në rrenë.
O Zot, për ty do ta këndoj një këngë të re, *
për ty do të luaj në harpën dhjetë kordash,
sepse mbretërve ti u jep fitoren, *
e shpëton Davidin, shërbëtorin tënd,
prej shpatës vrastare.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Do të të këndoj një këngë të re,
ty o Hyj, që jep fitoren.
Leximi i shkurtër Krh. Rom 12, 1-2
Po ju përbej me mëshirën e Hyjit, o vëllezër, ta kushtoni trupin tuaj fli të gjallë, të shenjtë e të pëlqyeshme Hyjit ‑ porsi kultin tuaj shpirtëror. Mos ju përshtatni parimeve të shekullit, por shndërrojeni e ripërtërijeni mendjen tuaj, në mënyrë që ta dalloni vullnetin e Hyjit: çka është e mirë, çka i pëlqen Atij, çka është e përsosur.
Përgjigjja e shkurtër
C Zemra e shenjtërve, * në ligjin e Zotit.
Zemra e shenjtërve, në ligjin e Zotit.
D E drejtë dhe e sigurt është ecja e tyre,
në ligjin e Zotit.
Lavdi Atit e Birit e Shpirtit Shenjt.
Zemra e shenjtërve, në ligjin e Zotit.
Kënga ungjillore (Benedictus Lk 1, 68-79)
Ant. I shndritur me dritën e Fjalës,
Bernardi shkëlqen me fe e urti
në mbarë Kishën.
Qoftë bekuar Zoti, Hyji i Izraelit, *
që e pa dhe e shpërbleu popullin e vet!
Ai e ngriti Shpëtimtarin tonë *
në shtëpinë e Davidit, shërbëtorit të vet,
sikurse premtoi kaherë *
me gojë të profetëve të tij të shenjtë:
se do të na shpëtojë prej armiqve tanë *
dhe prej dorës së të gjithë atyre që na urrejnë;
se do të bëjë mirësinë që ua premtoi etërve tanë *
e do t’i bjerë në mend Besëlidhja e tij e shenjtë
e betimi që bëri në të mirën e Abrahamit, atit tonë *
se do të na e bëjë të mundshme t’i shërbejmë pa frikë,
të çliruar nga duart e armikut *
në shenjtëri e drejtësi para tij
për çdo ditë të jetës sonë.
E ti, o djalosh, do të quhesh profet i të Tejetlartit, *
sepse do të shkosh përpara Zotit
për t’ia përgatitur udhët,
për ta vënë në dijeni popullin e tij *
se Hyji do ta shëlbojë duke ia falur mëkatet e tija,
në saje të zemrës së dashur të Hyjit tonë *
që do të na e dërgojë në pasi prej qiellit Diellin,
për të shndërritur ata që gjenden në errësirë
dhe në hijen e vdekjes, *
për t’i drejtuar hapat tanë në udhën e paqes.“
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. I shndritur me dritën e Fjalës,
Bernardi shkëlqen me fe e urti
në mbarë Kishën.
Lutjet e besimtarëve
Të bashkuar në liturgjinë e lavdit, ta thërrasim Krishtin Zot, që të na ndihmojë t’i shërbejmë në shenjtëri e drejtësi për çdo ditë të jetës sonë:
Shenjtëroje popullin tënd, o Zot.
Ti u sprovove në çdo gjë për t’u bërë i ngjashëm me ne në çdo gjë përpos në mëkat,
— o Zot Jezus, ki mëshirë për popullin tënd.
Ti i thërret të gjithë në dashuri të përsosur,
— o Zot Jezus, shenjtëroje popullin tënd.
Ti deshe që nxënësit e tu të jenë kripa e tokës dhe drita e botës,
— o Zot Jezus, shndrite popullin tënd.
Ti erdhe jo për të qenë shërbyer por për të shërbyer,
— o Zot Jezus, na mëso të shërbejmë në vëllezërit tanë.
Ti je shkëlqimi i lavdisë së Atit dhe vula e qenies së tij,
— o Zot Jezus, bëj që në fund të jetës të mund ta kundrojmë fytyrën tënde së bashku me shenjtërit e tu.
Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj, ti deshe që shën Bernardi abat, përplot me dashuri për Kishën tënde, të jetë në shtëpinë tënde llambë që digjet e ndriçon; na jep edhe neve atë zell shpirtëror që të jetojmë porsi bij e bija të vërtetë të dritës. Nëpër Zotin.
Përfundimi i Orës sikurse në Shërbesën e rëndomtë.
20 gusht, Shën Bernardi, abat dhe mësues i Kishës
E martë
Ora e mesme
E Tretë – e gjashtë – e nëntë
V Hyj, më eja në ndihmë!
P O Zot, shpejto të më ndihmosh!
V Lavdi Atit e Birit e Shpirtit Shenjt,
P si ka qenë në fillim,
ashtu tash e përgjithmonë e jetës. Amen. (K. P. aleluja).
Ora e tretë
Himni
Tash për ne, o Shpirti i Shenjtë,
me Atin një e me Birin,
denjohu të ndërhysh i gatshëm
në kraharorin tonë i shkrirë.
Gojë, gjuhë, mend shqise e forcë,
ta rrëfejnë me të madhe
me zjarr dashuria të ndizet
flakërimi të ngrohë t’afërmit.
Na bëj që ta kuptojmë Atin,
të njohim edhe Birin,
të dy edhe ty Shpirtin
të besojmë në çdo kohë. Amen.
Ora e gjashtë
Himni
Mbret i fortë, Hyj i vërtetë,
që sundon të gjitha sendet,
me ndriçim pajis mëngjesin
dhe me zjarr shkëlqen mesditën.
Shuaji flakët e shamatave,
flake zjarrin e dëmprurësve,
jepu trupave shërimin,
dhe të vërtetën paqe zemrave.
Bëj, o Atë tërë drejtësi,
dhe ti Bir baras me Atin,
bashkë me Shpirtin Ngushëllimtar
që mbretëroni ndër gjithë shekujt. Amen.
Ora e nëntë
Himni
Hyj i gjithësisë, fuqi e qëndrueshme,
i patrandur në ty mbahesh,
kohët e dritës së përditshme
përcakton me shumë mbarësi.
Dhe gjatë netëve lësho dritën,
që të mos ndërpritet jeta,
por çmimi i vdekjes shenjte
lavdia e përjetshme të jetë.
Bëj, o Atë tërë drejtësi,
dhe, o Bir, baras me Atin,
bashkë me Shpirtin Ngushëllimtar,
të mbretëroni ndër gjithë shekujt. Amen.
Në këto Orë nuk bëhet asgjë prej përkujtimoreve të shenjtërve, as nga pjesa Përkatëse as nga Përbashkorja.
Ora e tretë
Himni
Tash për ne, o Shpirti i Shenjtë,
me Atin një e me Birin,
denjohu të ndërhysh i gatshëm
në kraharorin tonë i shkrirë.
Gojë, gjuhë, mend shqise e forcë,
ta rrëfejnë me të madhe
me zjarr dashuria të ndizet
flakërimi të ngrohë t’afërmit.
Na bëj që ta kuptojmë Atin,
të njohim edhe Birin,
të dy edhe ty Shpirtin
të besojmë në çdo kohë. Amen.
Ora e gjashtë
Himni
Mbret i fortë, Hyj i vërtetë,
që sundon të gjitha sendet,
me ndriçim pajis mëngjesin
dhe me zjarr shkëlqen mesditën.
Shuaji flakët e shamatave,
flake zjarrin e dëmprurësve,
jepu trupave shërimin,
dhe të vërtetën paqe zemrave.
Bëj, o Atë tërë drejtësi,
dhe ti Bir baras me Atin,
bashkë me Shpirtin Ngushëllimtar
që mbretëroni ndër gjithë shekujt. Amen.
Ora e nëntë
Himni
Hyj i gjithësisë, fuqi e qëndrueshme,
i patrandur në ty mbahesh,
kohët e dritës së përditshme
përcakton me shumë mbarësi.
Dhe gjatë netëve lësho dritën,
që të mos ndërpritet jeta,
por çmimi i vdekjes shenjte
lavdia e përjetshme të jetë.
Bëj, o Atë tërë drejtësi,
dhe, o Bir, baras me Atin,
bashkë me Shpirtin Ngushëllimtar,
të mbretëroni ndër gjithë shekujt. Amen.
Në këto Orë nuk bëhet asgjë prej përkujtimoreve të shenjtërve, as nga pjesa Përkatëse as nga Përbashkorja.
Ant. 1 Tani e njihni urdhrin tim:
ecni sipas tij e do të jeni të lumtur.
Psalmi 119 /118/ XVIII (137-144)
I drejtë je, o Zot, *
edhe gjyqet e tua janë të drejta.
Ti e ke dhënë Ligjin tënd të drejtë *
dhe shumë besnik.
Zelli im po më shkrin *
kur shoh se armiqtë e mi i kanë harruar fjalët e tua.
Fjalët e tua janë me zjarr të sprovuara, *
prandaj shërbëtori yt i do ato.
Jam i ri edhe i përbuzur, *
por nuk i kam harruar urdhërimet e tua.
Drejtësia jote, drejtësi e përhershme, *
Ligji yt është i vërtetë.
Vuajta shumë dhe pata vështirësi, *
urdhërimet e tua janë kënaqja ime.
Dëshmitë e tua janë drejtësi e amshueshme, *
më bëj të kuptoj e do të kem jetë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Tani e njihni urdhrin tim:
ecni sipas tij e do të jeni të lumtur.
Ant. 2 Le të arrijë te ti urata ime, o Zot.
Psalmi 88 /87/
Urata e një njeriu të sëmurë rëndë
Kjo është ora juaj dhe pushteti i territ (Lk 22, 53).
I (2-8)
O Zot, Hyji i shpëtimit tim, *
ditë e natë hedh kushtrim para teje.
Le të mbërrijë te ti urata ime, *
vëru vesh dënesave të mia.
Sepse shpirti im është plot me vuajtje, *
jeta ime është në grykën e varrit;
po më mbajnë me ata që zbresin në gropë, *
jam porsi ai për të cilin s’ka më ndihmë:
i lirë si ata që vdiqën, *
porsi të vrarët që pushojnë në varre,
të cilët ti më nuk i kujton, *
që janë shkëputur nga dora jote.
Më plandose në shpellë pa fund, *
në errësirë e në hijen e vdekjes.
Felgrimi yt rëndon mbi mua, *
valët e tua i hodhe mbi mua.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Le të arrijë te ti urata ime, o Zot.
Ant. 3 Prej teje kërkoj ndihmë, o Zot,
mos e fsheh fytyrën tënde para meje.
II (9-19)
Prej meje i largove të njohurit e mi, *
për ta më bëre të jem i neveritshëm,
jam i mbyllur, jashtë s’mund të dal, *
prej mjerimit sytë e mi po shteren.
Gjithë ditën në ndihmë të thërras, o Zot, *
duart e mia drejt teje i shtrij.
Vallë për të vdekur bën ti mrekulli? *
A thua hijet ngrihen për të lëvduar?
Flet ndokush për mirësinë tënde në varr, *
për besën tënde në vendin e shkatërrimit?
Në errësirë njihen mrekullitë e tua, *
në vend të harresës drejtësia jote?
E unë, o Zot, prej teje kërkoj ndihmë, *
urata ime në mëngjes mbërrin para teje.
Pse, o Zot, e përbuz shpirtin tim? *
Përse fytyrën tënde e fsheh para meje?
I mjerë jam dhe vdes që prej fëmijërisë sime, *
më këputi barra e tmerrimeve të tua.
Përmbi mua kaluan hidhërimet e tua, *
përdhe më shtruan provat e tua!
Më kanë rrethuar pa pushim si uji, *
grumbullohen mbi mua njëherësh.
M’i largove mik e të afërm, *
bëj shoqëri veç me errësirën.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Prej teje kërkoj ndihmë, o Zot,
mos e fsheh fytyrën tënde para meje.
Në orët e tjera përdoren psalmet e tjera plotësuese
Ora e tretë
Leximi i shkurtër 1 Gjn 3, 17-18
Kush i ka të mirat e kësaj bote dhe e sheh vëllain e vet në ngushticë dhe e mbyll zemrën e vet para tij – në ç’mënyrë dashuria e Hyjit qëndron në të? Fëmijëzit e mi, mos të duam me fjalë e me gjuhë, por me vepra e në të vërtetë!
D Lum ai që e ka zemrën e mirë dhe bujare:
C i drejti do të jetë i bekuar përgjithmonë.
Ora e gjashtë
Leximi i shkurtër Lp 30, 11. 14
Ky urdhër që unë po ta jap sot, nuk është tepër i vështirë për ty as nuk është tepër larg teje.
Jo, Fjala është krejtësisht afër teje, mu në gojën tënde, në zemrën tënde që ta zbatosh!
D Fjala jote është dritëz për hapat e mi
C dhe dritë gjatë rrugës sime.
Ora e nëntë
Leximi i shkurtër Is 55, 10-11
Sikurse zbret shiu e bora nga qielli e atje nuk kthehet, por e ujit tokën, e zbrun dhe i jep fuqi të blerojë, i jep bujkut farën dhe bukën për ushqim, kështu edhe fjala ime që del prej gojës sime, s’do të kthehet tek unë pa fryt, pa pasë kryer gjithçka më pëlqen dhe pa pasë zbatuar atë për çka e nisa.
D Hyji e dërgon përmbi tokë fjalën e vet,
C lajmi i tij vrapon me shpejtësi.
O Hyj, ti deshe që shën Bernardi abat, përplot me dashuri për Kishën tënde, të jetë në shtëpinë tënde llambë që digjet e ndriçon; na jep edhe neve atë zell shpirtëror që të jetojmë porsi bij e bija të vërtetë të dritës. Nëpër Zotin.
Përfundimi i Orës sikurse në Shërbesën e rëndomtë.
20 gusht, Shën Bernardi, abat dhe mësues i Kishës
MBRËMËSORJA
V Hyj, më eja në ndihmë!
P O Zot, shpejto të më ndihmosh!
V Lavdi Atit e Birit e Shpirtit Shenjt,
P si ka qenë në fillim,
ashtu tash e përgjithmonë e jetës. Amen. (K. P. aleluja).
Himni
Bernard, inxhi prej qiellit,
lavdet, që ne të thurim,
ktheji në gëzimet tona
shpëtimi e në dhurata.
Ty Krishti ndezi n’plagën
e brendshme t’dashurisë,
e me kujdes ty zgjodhi
mburojë, shtyllë, llambë e Kishës.
Shpirti jetëdhënës të fali
gojë t’rrjedhshme të vërtetës,
duke të folë për mjaltët
e fshehtë n’kullota t’Engjëjve.
Me hov dashnie t’pastër
ty Nëna Virgjër mbushi,
që askush s’e ligjëroi
më thellë më lart se ti.
Ty të kërkuan gjykatës
mbretër, mësues, prelatër,
dhe adhurues vetmie
me famë e mbushe botën.
Trinisë i qoftë lavdia,
që duke lënë të shfaqet,
na dhëntë të shijojmë t’mirat
me ty n’gëzim t’përjetshëm. Amen.
Ose një himn tjetër, apo një këngë e miratuar nga autoritetet kishtare.
Ant. 1 Hyji më bëri predikues të Ungjillit,
për shkak të hirit që më dha.
Psalmi 15 /14/ (1-5)
O Zot, e kush do të guxojë të hyjë në tendën tënde? *
Kush do të guxojë të banojë në malin tënd të shenjtë?
Vetëm ai që jeton me nder, *
që vepron me drejtësi
e prej zemrës flet të vërtetën, *
që s’i shpifet kujt me fjalë,
që të afërmin s’e dëmton, *
që shokun nuk e çnderon:
ai që bakeqin e mban për asgjë *
e i çmon ata që e druajnë Zotin,
ai që i përbehet dashamirit të vet
dhe ia mban fjalën, †
nuk jep të holla me kamatë *
e nuk merr ryshfet kundër të pafajshmit.
Kush vepron kështu *
kurrë e për këtë jetë nuk do të luhatet.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Hyji më bëri predikues të Ungjillit,
për shkak të hirit që më dha.
Ant. 2 Shërbëtor besnik dhe i urtë:
Zoti ia besoi familjen e vet.
Lum ai njeri që e druan Zotin, *
që kënaqet në urdhërimet e tij.
Fara e tij do të jetë e fortë mbi tokë, *
do të bekohet breznia e të drejtëve.
Pasuri e mirëqenie në shtëpinë e tij, *
drejtësia e tij qëndron në shekuj të shekujve.
Ka lindur për të drejtët një dritë në errësirë: *
i butë e i mëshirshëm është njeriu i drejtë.
I ëmbël është njeriu që përdëllen e huajon, †
punët e veta i kryen me ndërgjegje, *
ai askurrë nuk do të bjerë poshtë.
Në kujtim të përhershëm mbetet i drejti, *
nuk i trembet lajmit të keq.
E patrandshme është zemra e tij me shpresë në Zotin, †
të fortë e ka zemrën, nuk do të trembet *
armiqtë e vet i bën asgjë.
Është dorëdhënë, u fal skamnorëve; †
drejtësia e tij qëndron në shekuj të shekujve, *
balli i tij ngallit për nder.
E sheh bakeqi dhe hidhërohet, †
me dhëmbë kërcëllon e vyshket. *
Dëshira e mëkatarëve shkon huq.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Shërbëtor besnik dhe i urtë:
Zoti ia besoi familjen e vet.
Ant. 3 Delet e mia do ta dëgjojnë zërin tim;
do të jetë një grigjë e vetme e një barí i vetëm.
Kënga Krh. Zb 15, 3-4
Të mëdha dhe të madhërueshme janë veprat e tua, †
o Zot, Hyj, o i Gjithëpushtetshëm! *
Të drejta dhe të vërteta janë udhët e tua,
o Mbreti i popujve!
Kush të mos të druajë ty, o Zot, †
dhe kush të mos e lavdërojë Emrin tënd?! *
Ti i vetmi, je Shenjti!
Të gjitha kombet do të vijnë †
dhe do të adhurojnë para Teje, *
sepse Gjyqet e tua u dëftuan të drejta!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Delet e mia do ta dëgjojnë zërin tim;
do të jetë një grigjë e vetme e një barí i vetëm.
Leximi i shkurtër Rom 8, 28-30
Ne e dimë se Hyji në gjithçka bashkëpunon me ata që e duan, me ata që, me vendimin e tij, janë të thirrur. Sepse, ata që ka njohur që më parë, ata edhe i paracaktoi të jenë të ngjashëm me Birin e vet, kështu që Biri i tij të jetë vëllai i parë në mes të shumë vëllezërve. Ata që i paracaktoi, ata edhe i grishi; ata që i grishi, ata edhe i shfajësoi, ata që i shfajësoi, ata edhe i lavdëroi.
Përgjigjja e shkurtër
C Zoti është i drejtë, * ai e do drejtësinë.
Zoti është i drejtë, ai e do drejtësinë.
D Ai i shikon të mirët me dashuri,
ai e do drejtësinë.
Lavdi Atit e Birit e Shpirtit Shenjt.
Zoti është i drejtë, ai e do drejtësinë.
Kënga ungjillore (Magnificat Lk 1, 46-55)
Ant. Mësues i frymëzuar, mik i Dhëndrit,
predikatar i Virgjrës Nënë,
Bernardi qe për abacinë e vet
atë tejet i shkëlqyeshëm.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvuajturit.
Me të mira i mbushi ata që s’kishin ç’të hanë
e të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Mësues i frymëzuar, mik i Dhëndrit,
predikatar i Virgjrës Nënë,
Bernardi qe për abacinë e vet
atë tejet i shkëlqyeshëm.
Lutjet e besimtarëve
Ta thërrasim Hyjin Atë, burimin e çdo shenjtërie, që me shembullin dhe me ndihmën e shenjtërve, të na ndihmojë të jetojmë në përputhje me pagëzimin tonë. Të themi së bashku:
Na bëj të shenjtë, o Zot, sikurse ti vetë je i shenjtë.
Atë i shenjtë, ti dëshiron të quhemi dhe të jemi me të vërtetë bijtë e tu,
— bëj që Kisha të të lavdërojë ty mbi mbarë tokën me dritën e shenjtërisë së saj.
Atë i shenjtë, ti që na fton të ecim denjësisht në rrugën e thirrjes sonë, kështu që të mund të të pëlqejmë ty në çdo gjë,
— bëj që të sjellim fryte të begatshme të veprave të mira.
Atë i shenjtë, ti që na pajtove në Krishtin,
— ruaji të gjithë ata që besojnë në emrin tënd, që të jenë një gjë e vetme me ty.
Atë i shenjtë, ti që na fton në gostinë e qiellit,
— bëj që të rritemi në dashuri në tryezën e bukës së gjallë që zbriti nga qielli.
Atë i shenjtë, bëj që vëllezërit tanë të vdekur ta kundrojnë fytyrën tënde,
— na bëj edhe ne të denjë për lavdinë tënde.
Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj, ti deshe që shën Bernardi abat, përplot me dashuri për Kishën tënde, të jetë në shtëpinë tënde llambë që digjet e ndriçon; na jep edhe neve atë zell shpirtëror që të jetojmë porsi bij e bija të vërtetë të dritës. Nëpër Zotin.
Përfundimi i Orës sikurse në Shërbesën e rëndomtë.
20 gusht, Shën Bernardi, abat dhe mësues i Kishës
E martë
V Hyj, më eja në ndihmë!
P O Zot, shpejto të më ndihmosh!
V Lavdi Atit e Birit e Shpirtit Shenjt,
P si ka qenë në fillim,
ashtu tash e përgjithmonë e jetës. Amen. (K. P. aleluja).
Në këtë moment është mirë të mbahet një kohë qetësie për të bërë shqyrtimin e ndërgjegjes. Në kremtimet e bashkësive mund të përdoret apo të përshtatet një nga formulat e pendesës që përdoren gjatë meshës.
Puna e pendimit
O Zoti im, po më vjen keq me gjithë zemër për të gjitha mëkatet që i kam bërë. Se kam bjerrë parrizin dhe kam merituar ferrin. Por më fort se të kam fyer Ty, o E mira e pambaruar, që kaq fort më ke dashur. Mëshirë, o Zot! Më fal, o Zot! Po të jap fjalën, me ndihmën tënde, që mos të të fyej më kurrë. Amen!
Himni
Para fundit të dritës,
ty duam, krijuesi i sendeve,
me mirësinë e zakontë,
të na kryesosh në roje.
Ty ëndrofshin zemrat tona,
në gjumë të rëndë Ty ndjefshin,
dhe gjithmonë lavdinë tënde
këndofshin në ag të dritës.
Na jep jetë të shëndetshme,
ngrohtësinë tonë përtërije,
mjegullën e zezë të natës
ta sqarojë drita jote.
Na jep, Atë fuqiplotë,
me anë t’Hyjit Jezu Krisht,
që me ty në amshim
mbretëron me Shpirtin Shenjt. Amen.
Ose:
O Krisht, që tërë shkëlqim e dritë
zbulon errësitë e natës,
e ndriçim drite quhesh
kur dritë u flet të lumëve.
O Hy i Shenjtë të lutemi
Ti në këtë natë na ruaj;
në ty të gjejmë pushimin,
na i bëj të qeta orët.
Nëse sytë i zë gjumi,
për ty zemra t’rrijë zgjuar;
të mbrosh me dorën tënde
besnikët që të duan.
Shiko, o mbrojtësi ynë,
na ruaj ndër prita e kurthe,
sundo shërbëtorët tu
që me gjak tënd shpërbleve.
O Krisht, mbret shumë i drejtë,
Ty e Atit iu qoftë lavdia,
me Shpirtin Ngushëllimtar
ndër shekujt e përhershëm. Amen.
Ant. 1 Mos e fsheh fytyrën tënde prej meje,
sepse shpresën e kam vënë në ty, o Zot.
Psalmi 143 /142/ (1-11)
Lutja në vuajtje
Nuk jemi shfajësuar në saje të veprave të Ligjit, por vetëm në saje të fesë në Jezu Krishtin (Gal 2, 16).
O Zot, dëgjoje lutjen time, †
vëri vesh sipas besnikërisë sate lutjes sime, *
më dëgjo në saje të drejtësisë sate.
Mos hyr në gjyq me shërbëtorin tënd, *
se asnjë i gjallë nuk mund të dalë i drejtë përpara teje.
Armiku e salvon shpirtin tim, *
përdhe e shtroi jetën time,
më ka lidhur në errësirë *
porsi të vdekurit e kahershëm,
shpirti im po rënkon në mua, *
të mpitë e kam zemrën në kraharor.
Më kujtohen ditët e shkuara, †
i kujtoj të gjitha veprat e tua, *
i peshoj veprat që ti i kreve.
I ngre drejt teje duart e mia, *
shpirti im si toka pa ujë ka etje për ty.
Mu përgjigj pa vonesë, o Zot, *
se mbeta pa frymë,
mos e fsheh fytyrën tënde prej meje *
të mos bëhem si ata që zbresin në varr.
Bëj ta dëgjoj mëshirën tënde në mëngjes, *
sepse shpresën e kam vënë në ty.
Ma mëso udhën së cilës duhet të eci, *
sepse te ti e kam lartësuar shpirtin.
Më shpëto prej armiqve të mi, *
o Zot, jam ndore tënde!
Më mëso ta kryej vullnesën tënde, †
sepse ti je Hyji im. *
Shpirti yt i mirë le të më prijë në vend të drejtë,
më përtërij në jetë, o Zot, pashë Emrin tënd. *
Pashë drejtësinë tënde nxirre shpirtin tim nga shtrëngimi.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Mos e fsheh fytyrën tënde prej meje,
sepse shpresën e kam vënë në ty, o Zot.
Leximi i shkurtër 1 Pjt 5, 8-9
Jini të përkormë dhe rrini zgjuar! Armiku juaj, djalli, porsi luan ulëritës, endet këndej dhe andej duke kërkuar (kë) të përpijë. Kundërshtoni të fortë në fe.
Përgjigjja e shkurtër
C O Zot, * në duart e tua po e dorëzoj shpirtin tim.
O Zot, në duart e tua po e dorëzoj shpirtin tim.
D O Hyj i së vërtetës, ti më ke shëlbuar:
në duart e tua po e dorëzoj shpirtin tim.
Lavdi Atit e Birit e Shpirtit Shenjt.
O Zot, në duart e tua po e dorëzoj shpirtin tim.
Ant. Na shpëto, o Zot, derisa rrimë zgjuar;
na ruaj kur flemë: që të rrimë zgjuar me Krishtin
dhe të gjejmë prehje në paqe.
Kënga e Simonit Lk 2, 29-32
Krishti, drita e popujve dhe lavdia e Izraelit.
Tani, o Zot, mund të lejosh të vdesë *
shërbëtori yt në paqe sikurse the ti vetë,
sepse me sytë e mi e pashë shëlbimin *
që ti e bëre gati në sy të të gjithë popujve:
Dritën që bën të njohin Ty paganët *
e që i jep nder popullit tënd, Izraelit.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Na shpëto, o Zot, derisa rrimë zgjuar;
na ruaj kur flemë: që të rrimë zgjuar me Krishtin
dhe të gjejmë prehje në paqe.
Lutja
Ndriçoje këtë natë, o Zot, që, pas një pushimi të qetë, të zgjohemi në dritën e ditës së re dhe të ecim me gëzim në emrin tënd. Nëpër Zotin
Vijon bekimi edhe kur Pasmbrëmësorja thuhet personalisht
Zoti i gjithëpushtetshëm na dhuroftë një natë të qetë
dhe një mbarim të mirë.
C Amen.
Antifona drejtuar Virgjrës Mari
Të falemi Mbretëreshë, Nëna e mëshirës, jeta, ëmbëlsimi e shpresa jonë, të falemi! Ty të thërrasim ne të shkretët, bijtë e Evës, që po fshajmë, po gjëmojmë e po qajmë në këtë shekull plot me lot. Deh pra, pajtorja jonë, ata sy të mëshirshëm të tu silli prej nesh! E Jezusin, të bekuarin, frytin e barkut tënd, pas kësaj shkretie na e kallëzo. O e dhimbshmja, o e buta, o e ëmbla Virgjëra Mari! Amen.
Nën mbrojtjen tënde po ngasim, o shenjta Nëna e Hyjit, mos na i përbuz lutjet ndër nevoja tona, por, o virgjëra e lume dhe e bekuar, na shpëto përherë prej të gjithë rreziqesh, Zoja jonë, dhe ndërmjetëse e jona. Me Birin tënd na pajto, Birit tënd na porosit ndër duar të Birit tënd na lësho.
Përfundimi i Orës, sikurse në Shërbesën e rëndomtë.
RM Albania