MEDITIMI I DITËS – DASMA E DJALIT

Mt 22, 1-13 DASMA E DJALIT

Kërkoj hirin: që të përgatis seriozisht petkat për gostinë e amshuar.

Në atë kohë, ¹ Jezusi filloi prapë t’u flasë në shëmbëlltyra priftërinjve dhe pleqve të popullit. Thoshte: ² “Mbretëria e qiellit është e ngjashme me Mbretin që bëri dasmë për djalin e vet.

Ja shëmbëlltyra e re për Mbretërinë qiellore. Jezusi ju flet krerëve të priftërinjve dhe eprorëve të popullit. Gjithnjë më shpesh dhe më qartë ua tërheq vërejtjen për refuzimin e dërgimit të tij si Mesi. Për këtë gjë ata ishin më përgjegjësit prandaj ju tregon shëmbëlltyrën e re.

Mbretëria qiellore është si dasma, dasma mbretërore. Mbreti e marton birin dhe ja përgatit dasmën. Duhet të jetë e madhërueshme dhe mbretërore. Jezusi në të vërtetë flet se si Ati i tij shikon dërgimin e tij si një dasmë të madhe. Ai e do botën aq shumë saqë me të e fejon birin e vet. Mbarë njerëzimi është e fejuara e Jezusit. Për këtë arsye kjo gosti është gëzimi i të gjithë të ftuarve. Jeta me Hyjin i përngjan gostisë në qoftë se ky përngjasim ka mundësi ta paraqesë pasurinë e jetës me të në Mbretërinë qiellore.

³ Mbreti dërgoi shërbëtorët e vet për të grishur të ftuarit në dasmë. Por ata nuk deshën të vijnë. ⁴ Dërgoi përsëri shërbëtorë të tjerë duke thënë: ‘Thuajini të ftuarve: gostinë e kam gati: i preva demat e mi e bagëtitë e majura! Gjithçka është gati! Ejani në dasmë!’

Hyji do që të vijnë të gjithë. Ai e fton secilin njeri, ai e përgatit dasmën. Jezusi dëshiron të thotë se ky është qëllimi përfundimtar i njeriut. Nuk na ka krijuar që të zhdukemi në hiç. Qëllimi ynë është dasma me Hyjin dhe gëzimi në Mbretërinë qiellore. Hyji është dashuri. Ai e do secilin njeri, prandaj jemi të thirrur që me dashuri të përgjigjemi në thirrjen e tij.

⁵ Por ata nuk ia vunë veshin e shkuan: kush në arën e vet e kush në tregti të vet. ⁶ Të tjerët, pastaj, i zunë shërbëtorët e tij, i munduan e i vranë. ⁷ Për këtë punë Mbreti u zemërua, dërgoi ushtrinë e vet, i vrau ata gjakësorë dhe e dogji qytetin e tyre.

Këtu çdo gjë është e qartë. Mbreti është Hyji, gostia e dasmës është gëzimi mesijanik, biri i mbretit është Mesia, të dërguarit janë apostujt dhe profetët, të ftuarit që nuk përgjigjen në thirrjen e të dërguarve të cilët i fyejnë janë Hebrenjtë. Djegia e qytetit është shkatërrimi i Jerusalemit.

Ndodhi diçka e pabesueshme. Njeriu ka mundësi ta duajë më shumë punën e vet se dasmën. Ka mundësi të kërruset aq shumë drejt toke dhe ta refuzojë thirrjen në gosti dhe gëzim në Hyjin. O Zot, më ndihmo që të mos të robërojnë punët, ara dhe tregtia ime që për shkak të tyre ta refuzoj thirrjen në gosti, në gëzim, në Eukaristi!

⁸ Atëherë u tha shërbëtorëve të vet: ‘Dasma njëmend është gati, por të ftuarit nuk qenë të denjë. ⁹ Shkoni, pra, në udhëkryqe e, këdo që të gjeni, thirreni në dasmë!’ ¹⁰ Shërbëtorët dolën nëpër udhë dhe i sollën të gjithë ata që gjetën: të mirë e të këqij. Kështu salloni i dasmës u mbush me të ftuar.

Pasi që nuk përgjigjën të thirrurit e parë, Mbreti i dërgon shërbëtorët që t’i thërrasin të gjithë njerëzit pa dallim, të mirë dhe të këqij, të gjithë kalimtarët në kryqëzimet e rrugëve. Ky është përngjasimi i Kishës sot. Të gjithë mund të vijnë dhe të gjithë janë të thirrur. Hyji na fton të gjithëve sepse do të na shpëtojë të gjithëve.

¹¹ Atëherë hyri edhe Mbreti për t’i parë të ftuarit. Vuri re aty njërin që s’e kishte veshur petkun e dasmës. I tha: ¹² “Mik, si hyre këtu pa pasur petkun e dasmës?” Ai s’e çeli gojën. ¹³ Atëherë Mbreti u tha shërbëtorëve: ‘Lidheni këmbësh e duarsh e hidheni jashtë në errësirë, ku do të jetë vaj e kërcëllim dhëmbësh!’ ¹⁴ Sepse, shumë janë të grishur, por pak janë të zgjedhur.”

Duhej bërë diçka para ardhjes në dasmë. Të ftuarit duhej te visheshin si u ka hije. Kjo ishte gjëja më e vogël që Mbreti e kërkoi nga të ftuarit. Me këtë gjë dëshiron që të gjithë ta kuptojnë seriozisht se me të vërtetë bëhet fjalë për dasmë të cilën e përgatit Mbreti dhe kërkon që të ftuarit të vishen në mënyrë të denjë.

Hyji kërkon prej nesh që të bashkëpunojmë me të në planin e shërbimit të njerëzve dhe të vetvetes. Petkat e dasmës paraqesin përpjekjen dhe angazhimin tonë. Të gjitha të tjerat janë dhuratë, neve na duhet që të përpiqemi që këtë dhuratë ta pranojmë denjësisht. Qortimi është shumë serioz. Kush nuk i ka petkat, nuk mund të rrijë në dasmë. Fatkeqësisht, nuk ka më kohë për të gjet petkat e dasmës, gjithçka mbaroi, ose mbetemi në dasmë ose jemi të përjashtuar dhe të hedhur në errësirë prej të cilës nuk ma dalje. Vaji dhe kërcëllima e dhëmbëve flasin për fatkeqësinë e shkatërrimit në të cilën përfundon secili që në dasmë vjen pa petkat e dasmës.

O Zot bëj që të përgatitem për dasmën e përjetshme me ty në të cilën më pret në Mbretërinë tënde. Bëj që në fjalët e mia veprat dhe dashurinë konkrete ti punoj petkat e dasmës që gjithmonë të jem i gatshëm për atë moment në të cilin do të më thërrasësh gjatë udhës së jetës.